Rescatada unha muller de avanzada idade nunha zona escarpada do Pereiro de Aguiar
Os equipos de rescate deron con ela nunha zona rochosa e de acceso complicado despois de varias horas de busca
A muller, de mobilidade reducida, foi trasladada ao Complexo Hospitalario Universitario de Ourense
Os servizos de emerxencia rescataron esta madrugada unha muller de avanzada idade nunha zona de difícil acceso situada no concello ourensán do Pereiro de Aguiar.
A alerta chegou ao 112 Galicia ao redor das 23:00 horas do día anterior, cando unha veciña contactou co número único de emerxencias ao botar en falta á muller, residente na parroquia de Sabadelle, desde había varias horas. Segundo indicou, tratábase dunha persoa maior con mobilidade reducida, polo que temía pola súa integridade.
De inmediato, o 112 Galicia activou un operativo de busca no que participaron axentes da Garda Civil, membros do GES do Pereiro de Aguiar e efectivos de Protección Civil da localidade.
As tarefas de procura prolongáronse durante varias horas, ata que, xa de madrugada, os equipos de rescate deron con ela nunha zona con abundantes rochas e de acceso complicado.
Unha vez localizada e liberada, foi atendida no lugar polo persoal sanitario do Servizo de Urxencias Sanitarias de Galicia-061 e trasladada ao Complexo Hospitalario Universitario de Ourense para a súa valoración médica.
