Rescatan dous mariñeiros tras sufrir unha vía de auga preto do dique de San Amaro na Coruña

Susto esta madrugada na Coruña, onde un barco de baixura estivo a piques de naufragar nas inmediacións do dique de abrigo de San Amaro. 

A vía de auga que sufríu o Cabo de Hornos Dos, foi por mor dun golpe de mar. Dedícase ás artes menores e contra as cinco da mañá saíu do porto á captura de polbo. 

Cando estaba a escasas dúas millas náuticas ao nordeste da Torre de Hércules saltaron as alarmas. A bordo ían o patrón do barco e un mariñeiro.

Inmediatamente alertaron a Salvamento Marítimo e, tras activar o protocolo, a Salvamar Betelgeuse remolcouno ata o porto de Oza e rescatou aos mariñeiros sans e salvos.

Intres despois, desde o porto de Oza, levaron o pesqueiro avariado remolcado e protexido cunhas barreiras anticontaminación ata unha zona próxima para a súa posta en seco. Alí será reparado e, probablemente nuns días, xa poderá saír de novo ao mar.