Rescatan un home que caeu dunha altura duns 9 metros mentres practicaba escalada en Noia

Aconteceu na tarde deste mércores. Mentres practicaba escalada cun grupo nunha parede situada nunha ladeira do monte, á beira do río Tambre ao seu paso por Noia. O lugar forma parte dunha ruta moi transitada por sendeiristas. De difícil acceso, porén, para os servizos de emerxencia, que tiveron que ir a pé máis de 1 km, desde a central hidráulica do Tambre ata o lugar do accidente. 

Tamén un helicóptero do O61 se achegou ao lugar, pero finalmente non foi necesario que interviñera. O home, de 36 anos e veciño de Santiago, caeu dunha altura duns 9 metros sen que, segundo parece, ninguén se explique o que aconteceu. No momento do rescate estaba consciente e non parecía que tivera lesións graves.

Inmediatamente despois foi inmobilizado e trasladado en padiola ese quilómetro de camiño, por onde os vehículos non puideron transitar, para ser atendido por fin na ambulancia que o trasladou ao hospital. Foi o punto e final dun rescate perigoso que durou case dúas horas polo complicado acceso ao lugar.