Rescatan un mozo tras caer ao mar cando facía escalada na zona dos faros de Mera
Rescatan un mozo tras caer ao mar cando facía escalada na zona dos faros de Mera
A vítima estivo consciente e na superficie en todo momento ata ser recollida da auga
Malia o susto que levou, só presentaba feridas superficiais
Aconteceu pouco antes das seis da tarde no cabo de Mera. Nesa zona, o mozo accidentado practicaba escalada deportiva canda outra persoa cando se precipitou ao mar na enseada de Montemeán.
"Estaba cun compañeiro que desde arriba alertou o 112 de que o mozo caera ao mar. Desprazouse a Salvamar de Salvamento Marítimo e solicitáronnos apoio por terra por se fose preciso facer o rescate por terra, pero non foi necesario", explica Juan Suárez, o coordinador do Servizo de Emerxencias de Oleiros.
Ao lugar tamén se desprazou a patrulleira Seixo Branco, do Servizo de Gardacostas de Galicia, que recolleu a vítima da auga ata o seu traslado á Salvamar Betelgeuse, que foi quen o achegou ata o porto de Oza.
"Alí agardaba unha ambulancia do 061 e, á parte do susto, estaba san e salvo", engade Suárez.
En boa parte porque soubo como reaccionar tras o incidente. "Actuou de xeito correcto, sabía ben o que facía. En vez de intentar achegarse ás rochas, o que fixo foi saír cara a fóra para evitar a rompente e agardar a que o rescatasen", di o coordinador do Servizo de Emerxencias de Oleiros.
Tras o susto que levou, o mozo, inicialmente, só tiña feridas superficiais.
