Rescatan un peregrino de 21 anos do mar en Fisterra
Rescatan un peregrino de 21 anos do mar en Fisterra
Foi necesario empregar un helicópero debido á forza do mar e o lugar onde estaba
O mozo permanece ingresado na UCI do CHUAC, onde se atopa estable
Un peregrino norteamericano de 21 anos foi rescatado a última hora deste mércores na praia do Mar de Fóra, en Fisterra. Tras o rescate foi ingresado na UCI do Complexo Hospitalario Universitario da Coruña (CHUAC), onde se atopa estable dentro da gravidade.
Os feitos producíronse sobre as 20:30 horas da tarde, cando varios particulares viron a un home no mar que tiña dificultades para regresar ao areal, debido á forte marusía.
Dada a situación, alertaron ao 112 Galicia, que pasou aviso ao Servizo de Urxencias Sanitarias de Galicia-061, Salvamento Marítimo, Servizo de Gardacostas de Galicia, Garda Civil da Coruña, Policía Local e á Agrupación de Voluntarios de Protección Civil da localidade.
Un dos particulares presente conta que o viu nun "momento de tensión" e que cando chegou xunto ao resto, pensou "que a persoa estaba morta, xa que non reaccionaba e tiña os ollos brancos". Mentres que un dos traballadores de protección civil que participaron explicou que foi un "rescate bastante complicado pola situación de mar e polo lugar onde estaba, porque el estaba metido nun retorta que hai nas pedras".
Aínda que sufriu mazaduras, posto que a forza do mar fixo que se golpease contra as pedras, conseguiu achegarse a unhas rochas polos seus propios medios e, coa axuda de varias persoas, saír da auga. O implicado, que tiña hipotermia, atopábase semiinconsciente e nunha zona de difícil acceso, polo que Salvamento Marítimo mobilizou un helicóptero que permitiu rescatalo.
Así, foi trasladado ata o aeroporto de Alvedro, onde esperaba unha ambulancia de Urxencias Sanitarias que o trasladou ao centro sanitario. Salvamento Marítimo tamén se fixo feito do rescate nas súas redes sociais, no que incide na importancia de dar a voz de alerta a tempo en situacións deste tipo.
Fontes consultadas por Europa Press confirmaron que o home, estranxeiro, permanece ingresado en coidados intensivos do hospital coruñés, onde foi trasladado na pasada xornada despois do seu rescate nesta praia de Fisterra.
