Rueda avanza que a Xunta destinará 54 millóns de euros dos orzamentos a medidas para unha "igualdade real"
Rueda avanza que a Xunta destinará 54 millóns de euros dos orzamentos a medidas para unha "igualdade real"
"Igualdade real, como real é a igualdade que queremos implantar dentro dos nosos concellos e en toda a sociedade galega", afirmou Rueda
O presidente da Xunta de Galicia e do PPdeG, Alfonso Rueda, avanzou este sábado que o Goberno galego destinará 54 millóns de euros dos Orzamentos de 2024 a medidas para alcanzar unha "igualdade real".
Así o anunciou no Foro de Alcaldesas do PPdeG celebrado en Boborás, Ourense, coas 28 alcaldesas galegas do PPdeG, que cualificou de "referentes da igualdade real".
"Por suposto, seguiremos reforzando a igualdade con políticas directas. A igualdade é moito máis que recursos orzamentarios, pero tamén hai que dedicarllos e implementar medidas de conciliación, de loita contra a violencia machista, de todo o que teña que ver coa igualdade real, como real é a igualdade que queremos implantar dentro dos nosos concellos e en toda a sociedade galega", aseverou respecto a eses 54 millóns de euros.
Destinaranse, puntualizou, a moitas medidas "novas", que se irán debullando estes días ata a aprobación dos orzamentos. "E que buscan esa igualdade real, que é tan necesaria, que a xente nos pide e que é máis fácil alcanzar con estes referentes, estas 28 mulleres alcaldesas que fan que o PPdeG senta moi orgulloso e que son referentes que a xente coñece cada día máis, a cada unha delas individualmente, actuando en conxunto, que son unha forza imparable", subliñou Rueda.
A este respecto, reivindicou a idoneidade de "visibilizar" ás mulleres "incorporadas pola súa valía, non máis que por outra cousa". "Son os seus veciños os que deciden que dirixan os concellos e algunhas, ademais, levan varias lexislaturas facéndoo, polo que creo que teñen moito que achegar", afirmou.
Considera o dirixente popular que, dado que o PPdeG é "o partido que máis se parece a Galicia, tiña que ser, loxicamente, o partido con máis alcaldesas en Galicia".
"O caso é non parar. Galicia non para e, por tanto, nós non queremos parar", defendeu, en contraposición ao que cualificou de "parálise" por parte do Congreso dos Deputados, "sen funcionar".
Medidas para 2024
A este respecto, detallou algunhas das medidas proxectadas pola Xunta. "Medidas que baixan impostos, medidas que apoian aos colectivos que máis o necesitan, empezando pola xente maior. Medidas que apoian ás familias para axudalas a soportar os gastos en momentos especialmente difíciles", sinalou.
Tamén medidas fiscais. "Galicia non sobe impostos en ningún caso, mantén as baixadas que ten e tenta tamén facer novas rebaixas", indicou Rueda.
Así mesmo, "medidas que apoian aos autónomos, medidas que blindan os servizos sociais ou algo tan importante como a sanidade pública". Sobre isto, referiuse á iniciativa anunciada este venres, "pioneira en toda Europa", de crear o mapa xenómico a todos os galegos de entre 35 e 65 anos para poder facer cada vez unha medicina "máis personalizada, previr máis enfermidades e tratar aquelas enfermidades graves que se detecten cos cribados".
![](https://img-g24-crtvg.flumotion.com/prog24/2023/20231028/20231028Rueda2.png)