Rueda, peregrino en bici, di que "Galicia está de moda" pola afluencia internacional

Do éxito do Camiño portugués a Santiago este segundo ano santo consecutivo poden dar fe as cifras de afluencia de peregrinos. E por esta ruta pedaleou este sábado o presidente da Xunta, Alfonso Rueda, canda outros integrantes da Administración autonómica.

Nesta etapa en bicicleta para promocionar esta ruta fixo parada en Caldas, onde lles deron a benvida o alcalde e outros membros da corporación municipal. Tras un café, Rueda canda os seus acompañantes subiron ás bicis para seguir o camiño cara a Santiago.

Rueda comezou o traxecto en Povoa de Varzim, en Portugal, tras o remate do consello da Xunta. Teñen a intención de chegar ata Santiago como mínimo e ver se son capaces de ir máis alá e chegar a Fisterra o domingo.

O presidente da Xunta animou os visitantes a probar a facer o camiño en bicicleta, xa que, asegurou, é seguro e é san. A Xunta aspira a que a finais de ano as peregrinacións supoñan case dous puntos do produto interior bruto de Galicia, e cre que se avanza nesa dirección.