Rufina, unha portorriqueña de 95 anos facendo o Camiño por quinta vez
Rufina, unha portorriqueña de 95 anos facendo o Camiño por quinta vez
Este venres completa no Obradoiro a que está a ser a súa segunda andaina pola ruta portuguesa en dez anos
Conta Rufina que este é o seu quinto Camiño a Santiago. O primeiro, cando tiña 85 anos, e dez anos despois, repetindo pola vía portuguesa en plan volta ao inicio e tamén para visitar un matrimonio de Pontevedra que coñeceu camiñando. Aínda que o reencontro só foi posible en parte porque, "desgraciadamente, el morreu hai dous anos", quéixase Rufina.
Este venres á tarde chega ao Obradoiro rematando unha andaina que empezou en Tui o domingo pasado. Cando aínda estaba por Caldas xa amosaba a súa enorme felicidade ao manifestar:
"Estou... estou co corazón inchado de tanta tensión e de tanto cariño recibido de todas as persoas".
Acompáñaa nesta ruta xacobea unha filla dentro dun grupo de 31 persoas procedentes de Porto Rico. O organizador das viaxes, Ricardo Gontalvo, gaba a fortaleza de Rufina tras viaxar con ela a Galicia desde 2013:
"Desde o primeiro día ata a próxima etapa, o seguinte camiño e o próximo ano... foi a máis. Esta é unha supermuller".
E Rufina asegura que tanto camiñar lle axuda para manter unha saúde boa.
"Entusiameime tanto que agora onde din Camiño eu quero estar", di a peregrina.
Ante esta veteranía de vitalidade xorde a curiosidade polo avituallamento da camiñada, e é enton cando lembra o seu descubrimento duna feitura de cervexa hai dez anos para celebrar a fin de etapa.
