Rutas guiadas para avistar aves polas areeiras de Sandiás
Rutas guiadas para avistar aves polas areeiras de Sandiás
Na antiga lagoa de Antela aniña unha gran variedade de especies
A Asociación das Amigas das Cegoñas organiza rutas guiadas pola antiga Lagoa de Antela. O obxectivo é avistar a gran variedade de aves que habitan na zona.
O mergullón cristado é unha das aves residente na Limia. Tamén asoma a cabeza por estas augas a garza, o corvo mariño ou o mergullón pequeno pero este domingo a meteoroloxía non acompaña e semella unha aventura complicada.
A xente que participa na ruta marcha sen ver as avefrías, tamén chamadas choromicas polo seu curioso canto. A Limia é a única zona de Galicia na que crían. As invernantes non chegaron porque en outubro aínda fixo calor.
O cambio climático tamén lle afecta á cegoña, que é estival. Antes, dicía o dito popular, polo San Bras a cegoña verás, agora para o mes que vén comezarán a chegar á Limia xa as primeiras, que marchan tamén antes.
Nas pozas que quedan tras a extracción de áridos en Sandiás teñen os seus niños. O rexurdir destas zonas húmidas fai que se estean a recuperar algunhas das aves que desapareceran co desecamento da lagoa de Antela.
