Salvan un home no Grove que se precipitou ao mar cunha furgoneta roubada

Contra as cinco e media da tarde do martes un home roubaba unha furgoneta de repartición de medicamentos ás portas desta farmacia do Grove.

Julián Armando Ortiz presenciou o roubo, di que o home aparcou o seu coche cerca da farmacia. Di que pouco despois chegou o furgón da farmacéutica. Asegura que a muller deixou a porta aberta e as chaves postas, momento en que o home aproveitou para roubalo.

Tras denunciar o roubo, a Policía Local e a Garda Civil montaron un operativo de busca. Pouco despois recibían o aviso de que un vehículo que coincidía coa descrición do roubado acababa de precipitarse ao mar dende o peirao.

Juan Campos, testemuña do accidente, di que o coche pasou a máis de cen quilómetros por hora e que non intentou frear. Apunta que saíu disparado.

Din que se nese momento os mariñeiros do Silbor non estivesen recargando, o condutor, un veciño de Santiago de 39 anos, afundiría coa furgoneta.

Félix Piñeiro, patrón do Silbor, confirmounos que nun primeiro momento o home non quería saír do vehículo e que non eran capaces de abrir a porta. Din que intentaron atar o vehículo ao barco para que non afundise e que foi nese momento cando o condutor saíu pola fiestra.

O home presentaba signos de hipotermia. Unha ambulancia do 061 trasladouno ata o hospital de Montecelo aínda que este mércores foi derivado ao  hospital clínico de Santiago.
Ata o lugar do sinistro tamén se desprazaron unha patrulla de emerxencias do Grove, da Policía Local e da Garda Civil, que xa abriu unha investigación para aclarar os feitos.