San Cristovo de Cea volveu celebrar a festa de exaltación do seu pan
San Cristovo de Cea volveu celebrar a festa de exaltación do seu pan
Trece fornos artesanais manteñen vivo o xeito tradicional de cocer o pan
Despacharon máis de 2.000 pezas esta fin de semana
Despois de dous anos suspendida pola pandemia, San Cristovo de Cea volveu celebrar a festa de exaltación dun dos pans con máis sona de Galicia.
“Falan moi ben del, din que é moi saboroso pola súa miga. Imos probalo", comenta un visitante.
Ademais da calidade dos ingredientes, o máis importante é o tempo de elaboración, segundo comentan as panadeiras de Cea.
“Nós temos o trigo en grao, levámolo ao muíño de auga e peneirámolo nós, e iso axuda ao sabor e á conservación”.
"Mantense sempre a maneira de facelo, son sete horas unha fornada e só temos como maquinaria a amasadora, o resto é todo a man”.
Trece fornos manteñen vivo este xeito tradicional de facer o pan, que se transmite de xeración en xeración.
“Entre pais, fillos, netos... é un proceso que gusta, é un traballo máxico pero tamén moi laborioso”.
No Consello Regulador din que a produción de pan de Cea vai en aumento, un 3 % nos últimos dous anos. Esta fin de semana de festa despacharon máis de 2.000 pezas.
