Santiago (é) Tapas, as rutas gastronómicas que atraen clientela en febreiro

Primeira fin de semana do Santiago (é) tapas: un concurso gastronómico no que participan 42 locais composteláns que ofrecen os seus mellores petiscos ata o próximo domingo de Entroido. Hai dez rutas deseñadas que permiten ir acumulando selos con cada tapa e trocar o "tapasporte" por agasallos na oficina de turismo.

Sete rutas que levan o nome dos Camiños de Santiago permiten percorrer a cidade parando en bares e restaurantes a probar as tapas elaboradas para o concurso. Súmanse ademais outras tres rutas de interese especial, a vexetariana, a doce e a sen glute. Petiscos hai para todos os padais.

Os negocios compiten por un premio de 1.000 euros á mellor tapa creativa, á mellor tradicional e á mellor doce, valoradas polos comensais e por un xurado profesional. Pero o premio é só unha das motivacións, a principal é atraer clientela.

"Febreiro é o peor mes do ano e si que se notou que pasou a ser un dos mellores. Move moita xente local, que é o que buscas tamén", di Álex Lomba, do restaurante O'Flanagan's.

"A primeira fin de semana foi un éxito esmagador, que tivemos que dicirlle que non a moita xente", asegura Guillermo Cutrín, do restaurante Sindueña.

Quedan aínda quince días para seguir coa cata pero xa hai quen ten favorita.

"Estamos repetindo porque a de cogomelos está boísima", di unha clienta.

E despois de saboreala, toca selar o tapasporte, a credencial dos bos catadores coa que se conseguen agasallos de produtos galegos ou abonos para seguir os equipos da cidade.