Amplían dez quilómetros o radio de busca do octoxenario desaparecido en Abadín

Enrique Bolívar Díaz Pardo, de 82 anos, leva xa cinco días desaparecido. Búscano medio cento de veciños e voluntarios, nun dispositivo coordinado pola Garda Civil, en que participaron cans de rastrexo e medios aéreos.

Para intentar dar con el, ampliouse o radio de busca ata os dez quilómetros de distancia, marcando aqueles lugares xa percorridos.

O octoxenario é veciño da Fontepresa, na parroquia de Quende, onde levaba anos vivindo só. Malia non atoparen pista ningunha do seu paradoiro, os participantes na busca non perden a esperanza.

O desaparecido ten mobilidade reducida, o que fai pensar que non puido ir moi lonxe polo seu propio pé.