Sen rastro do padexeiro desaparecido no río Lérez, en Pontevedra
Sen rastro do padexeiro desaparecido no río Lérez, en Pontevedra
Mergulladores da Garda Civil sumáronse pola tarde á busca, de momento sen éxito
As condicións do río, coa auga moi turbia, complican os traballos
Saíra adestrarse como facía habitualmente no tramo urbano do río Lérez. Todo o mundo fala de José Manuel Penas, de 49 anos, como un experimentado padexeiro, pero segundo as testemuñas, debeu sufrir algunha indisposición. A súa piragua envorcou e caeu á auga. Intentou nadar e deulle tempo a pedir auxilio, pero foi ao fondo antes de que conseguisen axudalo.
Cóntao Eva Villaverde, concelleira de Protección Cidadá de Pontevedra: "Chamou unha testemuña dicindo que o vira caer á auga e que pedía axuda, que intentaba nadar, pero que foi ao fondo inmediatamente".
Vicente Ferreira, xefe de servizo dos Bombeiros de Pontevedra, confirma: "Mantívose aboiando uns minutos. Nós chegamos aquí en dous ou tres minutos, pero xa non o vimos".
Ao dispositivo sumáronse posteriormente mergulladores do Grupo Subacuático da Garda Civil. As condicións complicaron os traballos de busca, que se centraron no tramo entre as pontes do Burgo e a das Correntes.
"As condicións do río son malas, hai moita corrente, a auga está moi turbia e é difícil localizar algo", di Manuel Oimil, voceiro da Policía Local de Pontevedra.
Vicente Ferreira, xefe de servizo dos Bombeiros de Pontevedra, apunta: "Neste tipo de dispositivos a busca sempre se empeza polo lugar da desaparición, pero hai moita corrente e non sabemos onde pode estar nin canto pode durar o operativo de busca".
Os traballos suspendéronse cando caeu a noite e retomáronse este sábado.
