Temperaturas baixo cero en zonas costeiras de Galicia na madrugada do sábado
Temperaturas baixo cero en zonas costeiras de Galicia na madrugada do sábado
Hai aviso amarelo no norte da Coruña e Lugo e na montaña de Ourense
A razón do frío intenso é o corredor de ventos do norte que crea a borrasca Juan
Os ventos do suoroeste farán remitir o frío a partir do mediodía do sábado
O intenso azul do ceo despexado do que gozamos este venres ten a súa contrapartida nunha intensa sensación de frío que se irá intensificando en toda Galicia durante a madrugada do sábado, mesmo na costa de Lugo e A Coruña. En Dumbría, por exemplo, está previsto que a mínima quede nun grao a próxima noite, unha temperatura moi baixa para esta zona.
A partir da medianoite vaise activar o aviso amarelo por baixas temperaturas practicamente en todas as comarcas costeiras de Galicia, e tamén no interior: en boa parte das provincias da Coruña e de Lugo, e no sur de Ourense, que será, como de costume, onde se rexistren as temperaturas máis xélidas: ata menos seis graos na comarca de Viana ou cinco baixo cero na da Limia.
![](https://img-g24-crtvg.flumotion.com/prog24/2024/20240119/CICLOXENESETRAEFRIO_frame_2043.png)
A razón desta friaxe súbita está nunha composición atmosférica pouco habitual provocada pola combinación da borrasca Juan sobre o centro da península e o anticiclón do Atlántico, segundo explica Juan Taboada de Meteogalicia.
"As isóbaras comprímense e chega aire frío do continente europeo e xunto con el unha sensación térmica bastante por debaixo do que marcan os termómetros para esta xornada".
Esta sensación térmica non vai durar moito, porque a partir da tarde do sábado o vento irá cambiando a suroeste e volveremos a temperaturas máis cálidas do que corresponde a esta época do ano.