Varios templos abertos, e con guía, no Camiño de Inverno
Varios templos abertos, e con guía, no Camiño de Inverno
Dúas igrexas de Quiroga e unha de Ribas de Sil amplían o seu horario de apertura
A de San Clodio, en Ribas de Sil, é unha das tres igrexas da comarca de Quiroga que van ampliar o seu horario de apertura. Grazas a un convenio entre o bispado de Lugo e Turismo de Galicia, abrirá todas as tardes de martes a sábado e contará cun guía.
A medida ten como fin facilitar as visitas aos templos situados no Camiño de Inverno. De feito, os peregrinos tamén poderán selar aquí as súas credenciais.
Marisol Tomé, guía turística: "Ademais temos unha aplicación de realidade aumentada, que lles permite visitar as ruínas da abadía e o exterior do edificio".
Outras dúas igrexas de Quiroga tamén se benefician desta iniciativa. Trátase de San Salvador de Hospital, para grupos e baixo demanda, e de San Miguel de Montefurado, que abrirá polas mañás de mércores a domingo.
Marisol Tomé, guía turística: "E comentarlles un chisco o que son os restos dos romanos, xa que Montefurado foi unha mina romana, como As Médulas. Temos en fronte o famoso túnel de Montefurado, que é o desvío do Sil para a extracción de ouro".
Tanto a igrexa de Montefurado como a de San Clodio xa recibiran o ano pasado visitas guiadas, organizadas polo Xeoparque do Courel debido ao carácter singular da chamada pedra cabaleira.
Ábsida do templo románico de San Clodio de Ribas de Sil, feita con pedra cabaleira
