Traspinedo pide xustiza para Esther López

Este domingo cúmprense dous anos do momento no que se lle perdía a pista a Esther López, veciña de Traspinedo, en Valladolid, cuxo cadáver foi atopado case un mes despois nunha cuneta do municipio. Nese momento tiña 35 anos.

Medio cento de veciños e familiares volveron concentrarse para lembrala e pedir xustiza. Nese acto, a irmá de Esther denunciou o "desamparo xudicial" e o desgaste que está a sufrir a familia.

A xuíz que instrúe o caso ampliou a investigación para practicar novas dilixencias. O único investigado, Óscar S. M., un veciño da localidade e coñecido da vítima, nega calquera implicación nos feitos. Continúa en liberdade coa obriga de comparecer semanalmente ante a Garda Civil. A familia de Esther López pide para el prisión provisional sen fianza.  

"Estamos rotos continuamente, é que así non se pode vivir, porque se che poñen un informe como o que temos na mesa e as dúas únicas medidas cautelares son que teña que asinar os luns e non saír do país, que esperas da xustiza? Sabemos que non era un xuízo, era unha declaración, pero hai persoas que coa metade da metade do que hai en contra do asasino da miña irmá, o xuízo espérano onde o teñen que esperar, que é no cárcere, porque son asasinos", dixo Inés López, irmá de Esther.