Trinta pemes presentan os seus logros no mercado exterior grazas ao programa Galicia Avanza

Galicia marcou no 2023 un novo récord de exportacións con 30.000 millóns de euros. Para axudar a posicionarse nos mercados estranxeiros, a Xunta e a Tecnópole abren nos vindeiros días unha nova convocatoria de Galicia Avanza. Hoxe 30 empresas presentaron os logros conseguidos no exterior grazas a este programa.

Son gominolas funcionais, sen azucre e con vitaminas. O vindeiro mes comezarán a elaborarse nunha fábrica propia en Nigrán pero que xa teñen abertos mercados en diferentes países.

O 80 por cento do calzado que deseñan unhas irmás de Pontevedra véndese nos Estados Unidos. Coa aceleradora de internacionalización Galicia Avanza conseguiron afianzarse.

Son dous exemplos de pemes que melloraron resultados e competitividade no mercado exterior con este programa impulsado pola Consellería de Economía e o Parque Tecnolóxico de Galicia.
Este mércores na Tecnópole 30 empresas presentaron os seus logros, nos vindeiros días abre o prazo para que outras pemes inovadoras poidan incorporarse a terceira convocatoria de Galicia Avanza.