Cen veciños de Amio, en Santiago, afectados por cortes de auga polas roturas da tubaxe
Cen veciños de Amio, en Santiago, afectados por cortes de auga polas roturas da tubaxe
Fartos de parches, piden o cambio de toda a tubaxe, que ten máis de corenta anos
As roturas constantes están danando o asfaltado
As últimas roturas, dúas seguidas, deixaron unha rúa de Amio, outra vez e xa son moitas, convertida nun río.
"O problema é que temos unhas tubaxes de fibrocemento, de amianto. Hai máis de corenta anos que está posta e agora, co paso do tempo, rompe", sinala Miguel Ángel Sixto, da Asociación de veciños do Monte do Gozo.
Miguel Puente, hostaleiro e veciño da zona, confirma: "Estes días rompeu abaixo e tocábaslle coa man e desfacíase, é que se desfai".
O problema esténdese por tres rúas dun barrio santiagués que medrou moito nos últimos anos, en tráfico e en veciños. Son un cento de afectados. Tamén negocios, entre eles, unha cafetería e un salón de peiteado, onde cruzan os dedos para non quedar sen auga no medio dunhas mechas. Están fartos de parches.
"Metéronlle un cacho. Xa tiñan todo posto e xa viron que empezaba a correr a auga outro pouco. Levantaron uns metros máis adiante e xa estaba estalado alí", explica Puente.
"Esta rompeu o venres. O sábado, outra uns metros máis alá, que rompeu dúas veces: ás sete da mañá, reparárona e ás doce volveu romper", engade Sixto.
"Baixan a presión da auga pero é igual. Un pouco que treme por un coche ou un autobús, rompe igual", lamenta o hostaleiro.
As sucesivas fendas van deixando as súas cicatrices, segundo denuncia a veciñanza.
"O problema da auga agrava o problema da estrada porque hai cen roturas nun treito tan curto, e a estrada está practicamente impracticable".
"Asfaltaron un treito ben asfaltado, pero a auga entrou por debaixo e levantou o asfalto todo. Saía a auga coma se foran fontes pola rúa abaixo".
"Non é máis sinxelo pór unha tubaxe nova e acabar co problema?".
Piden unha solución definitiva, o cambio duns 300 metros de tubaxe.
