Un coche impacta contra o muro e a galería de dúas casas de Abegondo
Un coche impacta contra o muro e a galería de dúas casas de Abegondo
O accidente causou moitos danos, pero non deixou feridos
O domingo á tarde, rexistrouse un accidente moi aparatoso en Abegondo, na estrada AC-542, que une o Mesón do Vento e Betanzos. Un coche saíu da estrada e levou por diante o muro dunha casa primeiro e despois a galería doutra vivenda veciña. O condutor circulaba en dirección Betanzos. Ao parecer, quedou durmido ao volante. O sinistro non deixou feridos.
"Chamoume a muller e comentoume que acababa de haber un accidente contra a nosa galería. Achegueime e xa vin todos os desperfectos. Ademais da miña, tamén foi a do veciño", concreta Carlos, o propietario dunha das casas.
O condutor saíu ileso. Foi atendido no lugar do accidente polos sanitarios do 061. Tamén se desprazaron ata o punto os bombeiros de Betanzos.
"O condutor xa estaba fóra do vehículo. Afortunadamente non sufriu danos persoais. Simplemente aseguramos a zona ata a retirada do vehículo e aseguramos a zona de cristais para que sexa seguro para os viandantes", explica o cabo dos bombeiros Eduardo Lourido.
A Garda Civil regulou o tráfico mentres durou a intervención.
