Un ensaio clínico abre a porta para tratar a doenza rara dun mozo de Mesía
Un ensaio clínico abre a porta para tratar a doenza rara dun mozo de Mesía
Sergio é unha das 65 persoas en todo o mundo que ten paraparesia espástica tipo 50
É unha doenza neuromuscular dexenerativa que provoca déficit cognitivo
O ensaio clínico vaise facer nun hospital de Donostia a comezos de 2024
Sergio, de 17 anos, é unha das 65 persoas en todo o mundo que ten paraparesia espástica tipo 50, unha doenza neuromuscular dexenerativa que lle foi diagnosticada hai cinco anos.
“Aféctalle a todos os niveis, non pode falar ben, tampouco camiña só. A nivel muscular provócalle rixidez nos músculos e vaino paralizando pouco a pouco. Canto máis maior, máis dificultades ten para moverse”, explica Nieves Taboada, a nai de Sergio
Agora vai ter a oportunidade de entrar nun ensaio clínico que se vai facer a comezos do próximo ano nun hospital de Donostia.
“O tratamento é unha única dose que se lle pon a través dunha punción lumbar. Iso viaxa pola medula ata o cerebro, e aí vai empezar a expresar a proteína que el non produce”, explica Nieves Taboada.
Ese mesmo ensaio clínico fíxose por primeira vez nos Estados Unidos e deu resultados esperanzadores.
“O neno que coñecemos, que é español e foi tratado alá, aínda que foi este ano cando se someteu ao tratamento, xa estaba dando os seus primeiros pasos só”.
A familia de Sergio comezou unha campaña de recadación de fondos a través das redes sociais para axudar a financiar o ensaio clínico, promovido pola Fundación Columbus, unha entidade que se dedica a investigar enfermidades raras a través de terapias xénicas.
