Un fenómeno inusual levanta parte do tellado de dúas vivendas en Cea

Un fenómeno atmosférico pouco habitual que se coñece co nome de vento catabático causou alarma en Cea este mércores. O que pasou foi que se xuntou un vento moi frío descendendo pola ladeira que hai detrás de San Cristovo de Cea.

Afectou o núcleo de Paramios, onde dúas vivendas sufriron as consecuencias deste fenómeno que tivo unha duración curta, pero moi intensa. Levantou parte do tellado de dúas casas e os propietarios contan que nun primeiro momento o que sentiron foi un ruído moi forte.

Afortunadamente só hai que lamentar pequenos danos materiais que xa están arranxados e o susto que pasaron.

O fenómeno produciuse arredor do mediodía. Só afectou dúas vivendas situadas unha en fronte da outra no lugar de Paramios. Os propietarios pensaron nun primeiro momento nun accidente.

Carlos Rodríguez, o propietario dunha das vivendas afectadas, asegura que levaron un bo susto, pero tamén os seus cans, que saltaron o valado da vivenda e logo non querían volver.

Por sorte, os danos só foron materiais. Os dous veciños afectados xa repararon os tellados ao longo da xornada de onte por temor a chuvia e á xeada.