Un home acoitela varias persoas nunha estación de tren de París

Un home atacou e feriu varias persoas cun coitelo na Estación Norte de París á primeira hora da mañá deste mércores. Segundo informou o Ministerio do Interior, o agresor xa foi detido.

Gèrald Darmanin explicou na súa conta de Twitter: "Un individuo feriu varias persoas esta mañá na Estación do Norte. Foi rapidamente neutralizado. Grazas ás forzas da orde pola súa reacción eficaz e valente".

Un individu a blessé plusieurs personnes ce matin à la Gare du Nord. Il a rapidement été neutralisé. Merci aux forces de l’ordre pour leur réaction efficace et courageuse.

— Gérald DARMANIN (@GDarmanin) January 11, 2023

Por motivos descoñecidos, o agresor arremeteu contra varios viaxeiros no interior da estación e foi un axente quen o neutralizou disparándolle.

O home que esta mañá atacou cunha arma branca a viaxeiros da estación do Norte de París e feriu a seis antes de ser reducido a tiros pola policía atópase entre a vida e a morte, explicou o ministro francés de Interior, Gérald Darmanin.

Nunha comparecencia ante a prensa na mesma Estación do Norte en presenza entre outros da alcaldesa de París, Anne Hidalgo, Darmanin sinalou que as forzas da orde traballan para saber quen é o agresor, debido a que non levaba papeis de identidade encima.

Sobre as posibles motivacións do seu ataque, despois de que circulasen rumores sobre os berros que supostamente deu mentres levaba a cabo a agresión, o ministro dixo: "Que eu saiba, non dixo nada". A Fiscalía Antiterrorista non se ocupa do caso, polo menos polo momento, o que dá unha idea dos elementos dos que dispoñen os investigadores sobre a caracterización dos feitos.

Segundo o relato de Darmanin, o ataque comezou ás 6:42 hora local cando o home agrediu a varias persoas na estación e un minuto máis tarde xa fora "neutralizado" polas forzas da orde.

Axentes que non estaban en servizo e outros policías que si estaban en misión disparáronlle tres veces e logo foi evacuado a un hospital. Seis persoas foron feridas polo agresor, unha delas de gravidade aínda que a súa vida non corre perigo. Entre elas hai un policía. O ministro fixo fincapé en que "sen a intervención extremadamente rápida da policía, habería vítimas".