Identifican o coche implicado no atropelo mortal ocorrido en Ourense

Un home faleceu tras ser atropelado na rúa Curros Enríquez, na Ponte Nova, no Concello de Ourense. Dez minutos antes da medianoite, varios particulares chamaron ao 112 para alertar do sucedido.

O falecido é un home de 43 anos de idade veciño de Xinzo de Limia. Ao parecer, recibiu o impacto de dous vehículos, se ben o primeiro, o que se deu a fuga, foi o máis violento. Fontes da investigación sinalan que o home caeu na estrada por unha indisposición e que o atropelo se produciu cando tentaban retiralo da vía.

"O tráfico estivo cortado en toda a ponte dúas horas. Non podiamos pasar e xa se sabía que había un home morto tapado e moita policía".

Agora a Policía Local xa identificou o vehículo que fuxiu, pero o seu propietario aínda non puido ser localizado polos axentes. Haberá, pois, que agardar a autopsia para determinar cal foi a causa exacta da morte.

Tamén será preciso esclarecer quen conducía o vehículo que fuxiu do lugar dos feitos logo de atropelar o falecido. A policía xa está a inspeccionar as cámaras e a reunir información entre os veciños da zona.