Un pesqueiro envorca nun varadoiro de Burela por segunda vez en tres anos

Un barco caeu de lado nos estaleiros de Burela cando estaba a ser izado para pintarlle o casco. Comezou a escorar a babor ata que envorcou no varadoiro. Dáse a circunstancia de que este mesmo pesqueiro xa envorcara hai tres anos, do mesmo costado, nun varadoiro da Coruña.

O barco en cuestión é o Lumian, un volanteiro con matrícula francesa de 226 toneladas e 34 metros de eslora. Cando envorcara na Coruña, complicáranse tanto os traballos que tardaran cinco meses en poñelo dereito de novo.

Dende o estaleiro burelao en que se produciu o sinistro sinalan que van traballar día e noite na montaxe de varios guindastres co fin de adereitar o buque esta mesma semana.