Un refacho arrastra en Lugo tres postos de artesanía e tira un ornamento do adro da catedral

Un dos elementos ornamentais do adro da catedral de Lugo rompeu debido á forza do vento. Cando estaban instalados catro postos da feira Cultura e Tradición no Camiño, tres voaron e o teito dun deles envolveu o ornamento de pedra, que foi arrastrado e partiu no chan.

Tanto a bóla de pedra como a súa base sufriron graves danos. Ademais destas pezas dun monumento que é Patrimonio da Humanidade, tamén se viron afectadas polo refacho as catro tendas de artesanía que se instalaran co permiso do bispado.

Teresa Astorgano, presidenta da asociación Traxandaina: "Fixo un efecto globo. Levantou todo e foi en cadea ata tombalos. Unha das bólas do muro do adro xa estaba afectada, segundo dixeron da catedral. A lona tirouna e rompeu".

Cada un dos postos estaba suxeito cuns pesos que sumaban 120 quilos, o que non evitou que o aire os levase. Agora, a feira de artesanía está instalada no patio da oficina de turismo da Xunta, situada na praza do Campo.

Teresa Astorgano, presidenta da asociación Traxandaina: "Tiñamos que tomar decisións ante o vento previsto, porque aquí vai haber obradoiros de 20 ou 30 nenos. E se había dispoñible outra localización, mellor".

Hai anos, xa fora restaurado outro dos ornamentos do adro, que tiraran os vándalos. Agora, dende o bispado van analizar os danos antes de presentar un proxecto de restauración ante Patrimonio.