Un veciño da Coruña circulaba cun ciclomotor sen permiso pola autoestrada e borracho

Circulaba pola autoestrada de xeito errático e cun ciclomotor. Cando o condutor foi interceptado pola Garda Civil, os axentes comprobaron que, amais de ir cun vehículo non autorizado nese tipo de estrada, o home carecía do permiso de condución. E non só iso, tamén quintuplicaba a taxa de alcol permitida. Sucedeu na AG-55, en dirección a Carballo. Foron outros usuarios da vía os que alertaron a Tráfico. O condutor é un veciño da Coruña que xa está a ser investigado por un delito contra a seguridade viaria.