Un vilagarcián marcha da casa por medo ao seu veciño
Nun vídeo pode verse como o veciño lle rebenta o portal cun mazo
A vítima denuncia que leva anos padecendo ameazas e pide axuda á policía e ao concello
As imaxes gravadas coa cámara de seguridade non deixan dúbida da violencia coa que un home ataca o portal do seu veciño de rúa. Ao parecer, as agresións físicas e verbais comezaron hai cinco anos, pero a situación agravouse nos últimos tempos. Tanto que a vítima, un veciño de Vilagarcía de 63 anos, tivo que marchar da casa e ir vivir coa súa irmá por medo.
"Meu tío ten problemas de saúde e tivo que marchar da casa por medo. Aquí non pode saír á rúa porque sae o veciño cun martelo e o ameaza, mesmo aí atrás sacou un coitelo", explica a sobriña da vítima, Leticia Domínguez Rey.
Teme pola vida do seu tío e pide axuda para que alguén se faga cargo da situación. Segundo di, o agresor padece unha doenza mental e podería non estar tomando o tratamento.
"Empeorou desde que morreu a nai, en xaneiro. Vive só e está día e noite facendo danos na casa do meu tío. Está sen vixilancia e eu creo que sen medicar".
Ten denunciada a situación ante a policía e o concello en numerosas ocasións. Mesmo asegura que o veciño foi condenado a arresto domiciliario por un dos ataques. Pero o problema persiste. Así que fai un chamamento para que interveñan os Servizos Sociais.
"Que actúen xa e miren por este home e o atendan, ou que o leven a un centro adecuado onde o coiden. Así non pode estar".
Asegura que o resto dos veciños tamén están afectados. Pero non tanto como o seu tío, xa que a súa casa está pegada á do acosador, co resultado dunha convivencia imposible.
