Un xulgado de Pontevedra anula unha multa porque non había dúas fotos diferentes da infracción
Un xulgado de Pontevedra anula unha multa porque non había dúas fotos diferentes da infracción
Á condutora sancionada chegáranlle dúas fotos, pero era a mesma imaxe en diferente tamaño
Un radar fixo da AP-9 detectou o vehículo da condutora a 109 quilómetros por hora nunha zona limitada a 100. Cen euros de multa sen retirada de puntos. A muller recorreu ante a DXT, que non atendeu a súa alegación. Daquela buscou amparo no xulgado e gañou. O xuíz anula a multa porque a sanción que lle chegou tiña dúas imaxes, pero son da mesma foto con distinto tamaño.
O xulgado de Pontevedra segue a doutrina que veñen aplicando outras instancias xudiciais. A diferenza dos móbiles, no caso dos radares fixos, a lei esixe unha segunda fotografía realizada nun instante distinto sobre a que teñen que figurar os mesmos datos que na primeira.
O feito de seren contías non moi altas fai que moitos condutores non recorran as multas, e Tráfico tampouco modificou ata agora o sistema, xa que o número de anulacións é aínda reducido.
