Reconverten en aloxamento turístico unha mansión indiana da Lama

Baixo o nome de Villa Boutique 1880, agóchase a historia de varias xeracións dunha familia galega con moito espírito emprendedor. Joaquina e o seu fillo, foron parte desta importante saga dos Piñeiro Contreras.

A historia desta mansión, agora reconvertida en aloxamento de luxo, mantense na súa restauración. Os seus balcóns, as súas ventás e os seus recunchos máis singulares. Por exemplo a súa cuberta de madeira en forma de rosa dos ventos.

Ten oito cuartos, e cada un deles ten un nome diferente que marca a personalidade dunha vila que tivo e segue tendo vida propia e que foi catalogada por Patrimonio con protección integral.

Está situada nesta aldea de Gaxate, na Lama, nunha parcela de máis de 6.000 metros cadrados. Nos seus exteriores a tranquilidade, só perturbada polo son do río Oitavén, son os protagonistas. Un lugar privilexiado que comeza novamente a renacer.

Abriu as súas portas este cinco de agosto, da man de Kike e Patricia, un matrimonio que brinda por esta importante aposta, que está tendo moi boa acollida entre os clientes que elixen natureza, arquitectura e sobre todo moita historia do noso pasado en Galicia.