Unha trintena de mulleres diagnosticadas con cancro participaron no equipo de 'dragon boat'

Quedaron ás once en punto. Non se coñecían entre elas, pero, maioritariamente, teñen dúas cousas en común: unha, que foron diagnosticadas cun cancro de mama e, dúas, o seu interese incipiente no dragon boat.

"Digamos que é unha embarcación onde padexamos vinte persoas á vez, pode haber distintos niveis entre nós, é unha folla moi pequena, os niveis de forza non son moi esixentes. E logo ten a parte emocional, o traballo en equipo é moito máis levadío, máis divertido", explica Pablo Tenreiro, promotor técnico da actividade e adestrador nacional de piragüismo.

O dragon boat empezou no 2002 en España. A oncóloga Alicia Folgar forma parte da área de humanización do HULA.

"Hai unha parte sobre todo dirixida ás pacientes de cancro de mama, onde ás veces poden sufrir linfedema, onde a realización desta disciplina en concreto pode favorecer, primeiro en que non se forme tanto, e segundo, cando xa está instaurada que poida mellorar", matiza a oncóloga radioterápica no HULA e coordinadora da área de Humanización Oncolóxica.

Eli e Teresa, diagnosticadas de cancro de mama hai dous e tres anos respectivamente, son dúas das persoas que se animaron a participar neste primeiro encontro.

"É fundamental o deporte, dáme vida e nótome moito máis áxil".

"Estar con máis xente coa que poidas interactuar e falar, e que tes un día malo, pois ben, sácante dese mal momento. Outro día tócache a ti".

A intención do encontro deste domingo é que en Lugo se cree o noveno equipo galego de dragon boat.