Unha veciña leva sufrido un mes de falcatrúas no coche aparcado nunha parroquia de Dodro

En Lestrobe non hai moito espazo para aparcar un coche e aprovéitase calquera recuncho en que non moleste a ninguén para deixalo. É o caso deste oco. Pero desde hai un mes a alguén deste lugar de Dodro non lle gusta ver aquí o coche da filla de Eva, e expresouno con falcatruadas:

"Aquí pode aparcar o meu fillo, como pode aparcar a miña filla, como pode aparcar calquera veciño. Empezamos a notar que quitaban un dos colectores do lixo e o poñían aquí aguantado con esas pedras. Non fixemos moito caso. Viña o camión da recollida e volvíano ao seu sitio. E así tres ou catro semanas. Ata o domingo, que veu miña filla. Serían as cinco da tarde ou as seis; cando marcharon, encontrouse con aquela pedra enriba do coche, pero... Quen foi, fíxoo con coidado e púxolle un papeliño de cociña por baixo, aínda que o raiou o mesmo máis unha rascada de adiante a atrás", explica Eva Santos, a nai da propietaria do coche prexudicado.

Supoñen que o autor da falcatrúa é un veciño, a quen lle piden que pase de feitos irracionais ao diálogo.

"Eu xa preguntei. E néganmo. Non vin a ninguén, pero é da aldea. É da aldea. Non hai máis", conclúe Eva.