Unhas 3.000 persoas padecen en Galicia retinose pigmentaria

A perda da visión é a consecuencia máis grave da retinose pigmentaria, unha enfermidade rara, dexenerativa e hereditaria que se estima que afecta a unha de cada 3.700 persoas. Moitas veces a súa diagnose confúndese cunha miopía severa ou un ollo vago, pero a súa sintomatoloxía acaba delatándoa.

"Unha diminución da visión nocturna ou crepuscular, cando estamos pasando do día á noite; unha diminución do campo visual e a perda da visión, da agudeza visual", comenta o oftalmólogo Francisco Gómez-Ulla.

En Galicia contabilízanse preto de 3.000 persoas afectadas pola retinose pigmentaria. Mais que unha enfermidade é un conxunto delas que deterioran as células da retina e acaban afectando a visión nocturna, a diúrna e a discriminación das cores, e chega nos casos máis graves á cegueira total. Nácese con ela, pero non se adoita detectar ata os trinta anos.

Polo momento, non hai un tratamento efectivo, aínda que nos últimos dous anos apareceron terapias exitosas en casos concretos.

"Agora existe un tratamento de terapia xénica pero para un tipo concreto de retinose pigmentaria:  a transmitida pola mutación RPE65. En España poden tratarse entre trinta e sesenta pacientes con esta mutación mediante terapia xénica. É unha vía revolucionaria de tratamento", explica Gómez-Ulla.

A terapia xénica é a grande esperanza para reverter as consecuencias desta enfermidade, da que mañá se conmemora o seu día mundial para lembrar as dificultades e a loita á que día a día se enfrontan as persoas que a padecen.