Unzué reclama en Santiago máis investigación e axudas para que os pacientes con ELA teñan unha vida digna

Antes do coloquio que vai ser ás sete da tarde no Auditorio de Abanca en Santiago, Unzué reuniuse cos representantes da asociación galega de ELA, cos profesores do grupo SEPA da Universidade de Santiago e cos medios de comunicación.

Hai apenas un mes que chamaba a atención no Congreso sobre a necesidade de que a lei ELA saia adiante. "Eu esta vez teño esperanzas. Non imos deixar que a lei quede outra vez no caixón", comentaba esta mañá ante os xornalistas.

Exfutbolista e adestrador, Unzué dedica agora o seu esforzo a lograr que os enfermos de ELA, os 4.000 que hai en España e os que están por vir, poidan ter unha vida digna. E iso, explica, pasa por recibir axudas acordes coas súas necesidades.

 "Cando temos que facer a traqueotomía, por problemas respiratorios graves, xa non podemos estar un minuto sós. Precisamos unha persoa que saiba que facer con ese respirador", explicou Juan Carlos Unzué, exfutbolista, adestrador e enfermo de ELA.
 

Os custos dos coidados nesta etapa superan os 60.000 euros anuais, algo que moitas familias non poden permitirse. Tamén reclamou Unzué máis fondos públicos para investigación.

"O último estudo que hai en relación aos cartos que se invisten en España para investigar a ELA falan dun 80 % de achegas privadas e so un 20 % de cartos públicos. Entón precisamos que ademais das axudas, a Administración invista máis en investigación", apuntou Juan Carlos Unzué,  exfutbolista, adestrador e enfermo de ELA 

Entre 8 e dez casos de ELA teñen unha base xenética. Os avances neste terreo, dos que hoxe falará en Santiago co fundador da Fundación Pública de Medicina Xenómica, Ángel Carracedo, apuntan a un futuro mellor.