Veciños do barrio coruñés dos Mallos piden unha solución aos problemas de seguridade

Tres grupos instalados en tres edificios ocupados ilegalmente que, a base de cometer continuos roubos con forza en comercios, vehículos e asaltar tamén peóns pola rúa, fan imposible vivir tranquilo. Esa é a radiografía que a policía fai da situación no barrio coruñés dos Mallos.

Os veciños seguen agardando unha solución aos problemas de seguridade no barrio. "Inseguirdade, estrés e mirando para todos os lados, pois como nós os coñecemos a eles, eles tamén nos coñecen a nós", apunta Rosa, veciña que amais pertence á plataforma veciñal Unidos polos Mallo, para engadir "que iso non é vivir".  A súa voz e as súas verbas son o sentir xeneralizado deste barrio coruñés.

Os problemas da zona veñen de tempo atrás, pero lonxe de solucionarse, nos últimos días foron a peor. "Atracan ás persoas maiores cando saen de cobrar as pensións, hai navalladas e pelexas entre eles" indica esta veciña.

Din que están moi preocupados polos últimos altercados que se rexistraron na zona. Entre eles, esta pelexa na rúa Noia ou o incendio que tivo lugar a escasos metros, na rúa Asturias. Pero tamén nesta rúa a de Diego Delicado sufriu un incendio que ben puido rematar en traxedia.

Parece que estes feitos están relacionados e os seus protagonistas son tres grupos de ocupantes que as autoridades teñen identificados. Con todo, ao tratarse de delitos menores, logo saen en liberdade.

Os veciños quéixanse de que nin o Concello nin as autoridades lles dan unha solución e cren que "están a pasar a pelota duns a outros", mentres os problemas de seguridade no barrio seguen a medrar.