A policía busca un tunisiano polo disparo a Vidal-Quadras
A policía busca un tunisiano polo disparo a Vidal-Quadras
A policía detivo este martes tres persoas en Málaga e Granada
![Un dos detidos polo atentado a Vidal-Quadras (EFE)](https://img-g24-crtvg.flumotion.com/prog24/2023/20231121/detidoquadras.png)
Os investigadores do intento de homicidio do expolítico Alejo Vidal-Quadras buscan unha persoa de orixe tunisiana como presunto autora material do disparo no centro de Madrid o pasado 9 de novembro.
A Policía detivo este martes tres persoas. Os axentes localizaron un primeiro home en Fuengirola (Málaga) presuntamente relacionado coa moto que foi achada calcinada en Fuenlabrada (Madrid) horas despois do ataque, que sería a usada na fuxida polo autor do disparo.
Os outros dous arrestos tiveron lugar en Lanjarón (Granada), onde foi localizado outro home a quen se relaciona cos preparativos do atentado, segundo confirman a Europa Press fontes da investigación, e a súa parella, aínda que sen poder determinar o seu grao de implicación.
Segundo adiantou El Confidencial, a policía centra agora as súas indagacións en localizar un cuarto implicado, un home de orixe tunisiana, que consideran indiciariamente autor do disparo realizado a plena luz do día á altura do número 40 da rúa Núñez de Balboa da capital.
Este home cubriu o rostro cun casco e viseira e dificultou a súa identificación. O autor do disparo achegouse pé de Vidal-Quadras e disparoulle unha única vez no rostro; despois, fuxiu do lugar axudado por unha segunda persoa que o esperaba en moto.
O propio Vidal-Quadras apuntou que o atentado podería estar relacionado con Irán, un país co que ten vínculos polo seu apoio á oposición ao réxime teocrático, que o incluíu na súa lista de personalidades obxecto de sancións por prestar "apoio a grupos terroristas e propagación da violencia e o odio".
A Audiencia Nacional fíxose cargo da investigación dado que podería tratarse dun posible atentado terrorista
A investigación declarouse secreta e recaeu no Xulgado Central de Instrución NJúmero 5, do que é titular o maxistrado Santiago Pedraz, pero ao estar de permiso fíxose cargo o xulgado que o substitúe, que é o número 1, dirixido por Francisco de Jorge.
Este martes, o Hospital Xeral Universitario Gregorio Marañón actualizou o parte médico e informou de que Vidal-Quadras continúa evolucionando favorablemente tras ser intervido o pasado día 9 de novembro da dobre fractura mandibular.