Pontón presenta a súa candidatura á Xunta: "Aspiro a mellorar a vida da xente"

A voceira nacional do BNG Ana Pontón presentou este domingo a súa candidatura á Xunta: "Aspiro a ser presidenta para mellorar a vida da xente nunha Galicia en que facer realidade os nosos soños", manifestou.

O BNG aprobou onte o regulamento para a elección da candidatura á Presidencia da Xunta, que concluirá o 25 de novembro cunha votación.

A primeira candidatura presentada e a única polo momento é a de Pontón, arroupada por militantes e cargos institucionais.

A carreira electoral para as próximas eleccións autonómicas, que como moi tarde serán no verán de 2024, será, se é designada candidata, "un dos retos máis grandes" da súa vida.

"Quero ser a próxima presidenta da Xunta de Galicia. Creo que este país merece moito máis, podemos conseguir unha Galicia en grande, unha Galicia que mellore a calidade de vida de todos", relatou.

Confiou na posibilidade de "construír un país mellor" e situar a Galicia "entre as nacións máis avanzadas do mundo".

"Aspiro a ser presidenta para mellorar a vida da xente nunha Galicia en que facer realidade os nosos soños", engadiu.

Pontón reclamou un futuro para os mozos, pois pensa que na actualidade se ven obrigados a saír de Galicia.

Por iso percibe un "profundo movemento de cambio" na comunidade autónoma, que, segundo ela, "está en marcha e é imparable".

Quere ser unha presidenta "coas mans libres para defender os intereses dos galegos e as galegas", xa que entende que os partidos estatais, PPdeG e PSdeG, teñen que responder ante Madrid.

Así, quedou presentada a súa candidatura e ata o 13 de novembro calquera militante pode presentarse se logra un apoio mínimo doutras 200 persoas.

A continuación, haberá 26 asembleas en toda Galicia entre os días 14 e 19 de novembro, informa o BNG nun comunicado.

Por último, o Consello Nacional reunirase de novo o 25 de novembro para a proclamación da candidatura elixida.