21 detidos por tráfico de meixóns e 800 quilos comisados en España e Portugal

A Garda Civil, en colaboración coa Policía Marítima de Portugal, detivo a 21 persoas de distintas nacionalidades e incautou máis de 800 quilos de meixóns nunha operación na que desmantelou unha organización criminal internacional que operaba entre os dous países.

A operación Olissipo desenvolveuse ao longo de dous anos e conseguiu desmantelar toda a infraestrutura necesaria para manter os meixóns  con vida e preparar a súa exportación a Asia, segundo informa a Garda Civil, que lembra que actualmente está totalmente prohibida a exportación do meixón ao exterior.

Comisáronse uns 420 quilogramos de meixóns no transporte aéreo e 293 kg no transporte terrestre, o que suma un total de máis de 800 kg de angulas vivas incautadas no marco desta investigación

A organización sacaba os meixóns da UE na equipaxe persoal, para o que empregaban maletas acondicionadas para o seu transporte con bolsas inxectadas de osíxeno, para garantir a súa supervivencia ata 42 horas.

Localizáronse ademais empresas pantalla constituídas expresamente para a exportación de meixón cara a Asia, que camuflaban as exportacións entre outros produtos refrixerados.

Ata 9.000 euros por quilo no mercado ilegal

Os detidos empregaban estruturas de crime organizado especialmente complexas, similares ao ámbito do tráfico de drogas, debido aos grandes beneficios económicos que pode alcanzar os 9.000 euros por quilo, no mercado ilegal.

A Garda Civil explica que os integrantes tiñan roles claramente definidos que ían desde os pescadores ilegais aos intermediarios, que realizaban a primeira recepción do meixón; o segundo chanzo de almacenamento e, finalmente, a exportación cara a Asia.

Respecto diso, a Garda Civil destaca que "esta operación representa un paso importante para preservar os recursos naturais e salvagardar o patrimonio marítimo común destes dous países ibéricos".