6.618 persoas morreron no seu intento de chegar a España en 2023, 18 cada día
6.618 persoas morreron no seu intento de chegar a España en 2023, 18 cada día
A organización Caminando Fronteras sinala que o ano que acaba de finalizar foi o máis mortífero desde que ten rexistros
A ruta atlántica cara ás Canarias é a que contabilizou máis falecementos: 6.007 persoas mortas
![](https://img-g24-crtvg.flumotion.com/prog24/2023/20231028/20231028Canariasmigrantes.png)
Un total de 6.618 persoas morreron en 2023 tentando chegar ás costas españolas, unha media de 18 cada día, cifra que case triplica a rexistrada en 2022, cando morreron 2.390 migrantes.
É o balance que fai o colectivo Caminando Fronteiras na nova edición do seu informe Vixilancia Dereito á Vida, presentado este martes en Madrid, que sitúa ao 2023 como o ano "máis mortífero" desde que a organización comezou a ter rexistros, en 2007.
Entre as persoas que morreron nas rutas de acceso a España ao longo do ano que acaba de terminar había 363 mulleres e 384 nenos e nenas.
Do total de falecidos, a gran maioría, 6.007, morreu na ruta atlántica cara ás Canarias, mentres que 434 persoas morreron na ruta alxeriana do Mediterráneo occidental; 147 migrantes, no Estreito de Xibraltar e 30, na ruta de Alborán.