A area invade un carril da principal estrada de acceso a Muxía

Durante algo máis dunha semana un dos carrís da estrada que une Berdoias con Muxía ao seu paso pola praia da Cruz estivo cortado a causa da gran cantidade de area acumulada na vía. Nalgúns tramos formouse unha duna de ata un metro de altura. Dous operarios de Mantemento de Estradas da Xunta estiveron retirando a area durante boa parte da mañá. Os veciños agradéceno pero din que en breve volverá estar igual.

Quéixanse de que cando a area invade a estrada o perigo é constante para os condutores e tamén para os viandantes.

Os veciños piden ás administracións competentes que senten para buscar unha solución definitiva a este problema.

Dende o concello de Muxía lembran que esta é unha estrada autonómica sobre a que non teñen competencia. Aseguran que no mes de setembro xa lle trasladaron tanto a Costas como á Xunta, como titular da estrada, que existía este problema recorrente neste punto da AC-440.