A defensa do veciño de Oroso que estrangulou a nai e queimou o piso pide a súa libre absolución

A defensa do home condenado a 22 anos e medio de cárcere por estrangular a súa nai e incendiar o domicilio familiar en Oroso (A Coruña) en xuño de 2021 solicitou a súa libre absolución por falta de probas.

Na vista de apelación que se celebrou este luns no Tribunal Superior de Xustiza de Galicia, a defensa do condenado defendeu “a presunción de inocencia” e sinalou que “non existiu unha proba suficiente” para condenalo. A Fiscalía, pola súa banda, pediu que se ratifique a sentenza, que o condena a 17 anos de cárcere por un delito de asasinato, concorrendo a circunstancia de aleivosía, e a outros 5 anos e seis meses por un delito de incendio con risco para a vida ou integridade física das persoas, concorrendo a circunstancia atenuante de reparación do dano.

Segundo o relato de feitos probados do ditame, o home aproveitou que a súa nai estaba na cama para "asfixiala utilizando unha peza de roupa, probablemente unha camiseta, que enrolou no seu pescozo e apertou, durante uns minutos, ata causarlle a morte". Ademais, a sentenza indica que "tras acabar coa vida da súa nai", o home procedeu a "prender lume ao domicilio, utilizando varias substancias acelerantes" para dificultar a investigación.