A Deputación da Coruña pagará a Seguridade Social dos cerqueiros no paro biolóxico

A Deputación da Coruña aboará os gastos da Seguridade Social aos tripulantes dos cerqueiros e artes pequenas dependentes da captura de xurelo, que teñen unha pausa biolóxica durante tres meses.

Trasladóullelo o presidente provincial, Valentín González Formoso, a representantes das confrarías da provincia da Coruña e das Asociación de Armadores de Cercados de Galicia (Acerga). O organismo provincial pretende complementar as axudas do Goberno central durante o tempo que dure a parada biolóxica adoptada pola Unión Europea.

Segundo explicou, as achegas da Consellería "son insuficientes para as embarcacións paradas", polo que "unha vez máis a Deputación quere estar ao lado dos problemas do sector".

Neste senso, González Formoso anunciou unha serie de subvencións que convocará de inmediato para "sufragar os gastos da Seguridade Social de todos os mariñeiros durante os tres meses de paro biolóxico".

Así, poderán percibir ata 18.000 euros por barco durante este paro, que afectará a unhas 56 embarcacións da provincia. O orzamento global ascende a 684.000 euros.

O secretario da patronal Acerga, Alberto Castro, asegurou que "todas as axudas son benvidas polo sector".

Noutra orde de cousas, o presidente da Deputación da Coruña indicou que falou coa ministra para a Transición Ecolóxica, Teresa Ribera, sobre o impacto que poden causar no sector pesqueiro galego os proxectos de desenvolvemento da enerxía eólica mariña. Segundo González Formoso, a ministra comprometeuse a conversar con representantes do Observatorio da Enerxía Eólica de Galicia.

Formoso afirma que "o primeiro é preservar a pesca" e recalca que "calquera medida debe contar coa aceptación do sector", o que non mostra "un peche sen sentido". Ao seu xuízo, cómpre achegar "pedagoxía e certezas" sobre estas perspectivas, xa que "en Galicia a pesca é un sector estratéxico e leva séculos facendo o país".