A dixitalización das lonxas axiliza o traballo e garante a trazabilidade

Nada menos que 35 lonxas galegas adheríronse desde 2018 ao programa Primare Lonxas 4.0, que as coloca entre as máis avanzadas informaticamente de Europa.

Así o explicou a Conselleria do Mar Rosa Quintana na súa visita a tres dos puntos de marisqueo da ría de Pontevedra adheridos a esta plataforma Primare Lonxas 4.0.

É un sistema en que mediante unha tarxeta persoal as e os traballadores xa saben en canto chegan á lonxa canto van gañar ese día. Só teñen que subministrarlle os datos ao ordenador e este failles as contas.

A patroa maior de Lourizán dixo que era como levar un billete de supermercado. Para Rosa Quintana, o sistema asegura totalmente a trazabilidade e o control sobre o produto recollido  e ademais mellora as condicións de traballo dos profesionais. 

Programa Primare Lonxas 4.0

Hai case un ano, o programa Primare Lonxas 4.0 acelerou a dixitalización nas de Pontevedra e Poio, que axiliza o traballo das mariscadoras, asegura a trazabilidade e control do produto e mellora a comercialización. Cada mariscadora ten unha tarxeta magnética con que rexistra o produto recollido, clase, cantidade e tamaño. Os datos métense directamente no ordenador da lonxa.

"Creo que é a mellor forma de acreditar a trazabilidade do produto, os controis rigorosos que se fan cando o produto non dá a medida e volve inmediatamente sementarse na praia, e acreditamos unha vez máis que imos por diante do resto das rexións pesqueiras da UE no control estricto que facemos da produción dos nosos bancos, que é en automático, digamos", explica Rosa Quintana, Conselleira do Mar.

"O proceso é máis rápido e os mariscadores xa saben con esa tarxeta realmente o que van gañar", comenta Mari Carmen Vázquez. Patroa maior da confraría de Lourizán.

Automaticamente, os datos rexistrados pasan tamén á Consellería, onde xa se fai o control diario do que se vende decote nas lonxas adheridas a un sistema que permite ademais asistir ás poxas virtualmente nestes tempos de pandemia.

O único problema, din, é cando falla a propia tecnoloxía.