A DXT prevé 7,5 millóns de desprazamentos neste inicio da ponte festiva de Santiago
A DXT prevé 7,5 millóns de desprazamentos neste inicio da ponte festiva de Santiago
A DXT preparou unha operación especial con reforzo da vixilancia e da regulación da circulación desde as tres da tarde deste mércores ata as doce da noite do domingo
O xoves é festivo en Galicia, Cantabria, Madrid, Navarra e País Vasco
![](https://img-g24-crtvg.flumotion.com/prog24/2024/20240323/SATDIROPERACIONSAIDAMATERIAL2403221339_frame_19926.png)
A Dirección Xeral de Tráfico (DXT) prevé 7,5 millóns de desprazamentos por estrada durante a ponte de Santiago, para o cal montou unha operación especial con reforzo da vixilancia e da regulación da circulación desde as tres da tarde deste mércores ata as doce da noite do domingo.
O xoves é festivo en Cantabria, Galicia, Madrid, Navarra e País Vasco, así que coincidirán na estrada cidadáns que empezan vacacións e aqueles que gozarán da ponte ou da fin de semana.
Tráfico fai un chamamento a prestar especial atención ás estradas convencionais, aos desprazamentos curtos e á maior presenza de motoristas, ciclistas e peóns e tamén a ter prudencia e lembra que desde o pasado día 1 faleceron en sinistros viais 77 persoas.
Castela-A Mancha, Comunidade Valenciana e as provincias de Segovia, Ávila e Xaén, a pesar de non celebraren a festividade de Santiago o xoves, tamén forman parte do dispositivo por canto son zonas de influencia e de tránsito de vehículos das comunidades onde si é festivo.
Moitos dos desprazamentos que se realicen serán ás zonas turísticas de costa e litoral e mais a segundas residencias.
Como vén sendo habitual, os maiores problemas circulatorios poderanse atopar o mércores pola tarde e durante o xoves á mañá nas comunidades autónomas onde o Santiago é festivo, nas saídas das grandes cidades e tamén nas principais vías de comunicación, e acentuaranse a medida que avanza a tarde, para xa a última hora situarse nas zonas de destino.