A Fiscalía investigará o posible acoso á moza que se suicidou en Xixón
A Fiscalía investigará o posible acoso á moza que se suicidou en Xixón
Exalumna do colexio La Asunción, deixou unha carta en que denuncia que sufriu acoso na súa etapa escolar
O Goberno do Principado vai abrir unha investigación "con toda a contundencia" para esclarecer o sucedido
![O colexio onde supostamente se produciron os feitos](https://img-g24-crtvg.flumotion.com/prog24/2023/20230503/TPA20230429042SUICIDIOACOSO_frame_73.png)
A Sección de Menores da Fiscalía do Principado de Asturias vai investigar a existencia dun posible caso de acoso escolar en Xixón, despois de que unha moza de 20 anos se suicidara tras deixar unha carta manuscrita en que denunciaba que sufrira bullying durante a etapa colexial.
Segundo informou, as dilixencias foron incoadas este mércores tras recibir o atestado do Corpo Nacional de Policía, por providencia do Xulgado de Instrución número 2 de Xixón.
De acordo co atestado, os presuntos autores dos feitos, "de confirmarse a súa existencia", eran menores de idade no momento da súa perpetración.
A Fiscalía practicará as probas que considere oportunas "para concretar os feitos ocorridos, as datas nas que supostamente sucederon e os presuntos autores".
Investigación do Principado
O presidente do Principado, Adrián Barbón, tamén anunciou o pasado domingo que o Goberno asturiano vai abrir unha investigación "con toda a contundencia" tras a morte da exalumna do colexio La Asunción. O cadáver foi localizado o sábado ao pé do cerro de Santa Catalina, en Xixón.
O mandatario dixo este martes que "non se pode calar" ante o acoso escolar, unha situación que debe ser denunciada por quen o coñeza "dunha forma ou doutra".
Á disposición da familia
Pola súa banda, a dirección do centro educativo publicou o mesmo sábado unha nota en que expresaba a súa "enorme tristeza e conmoción" e aseguraba que "a boa convivencia e a loita contra o acoso escolar está entre os seus principios fundamentais".
Por iso, a dirección ponse "á disposición da familia, da comunidade educativa e se fose necesario, das autoridades".