A Garda Civil asiste máis de 50 avarías ao día nas estradas galegas

No que vai de ano, a Garda Civil tivo que asistir 9.000 avarías nas estradas galegas. A cifra medra cada día polo envellecemento do parque móbil ou a súa mala conservación. Para minimizar riscos o primeiro é manter a calma e buscar onde parar.

"Non fai falta parar xusto cando comeza a ir mal o coche. Se é posible hai que buscar un sitio seguro e visible mellor fóra da vía, na beiravía, e poñerse a sinalizar", explica o garda civil Héctor Teixeira.

Co chaleco posto saímos sinalizar. Na actualidade está permitido usar a luz V16 no teito do coche, o triángulo a 50 metros de distancia, ou ambos dispositivos xuntos. A partir de 2026 só poderá usarse a luz e terá que ter un dispositivo de xeolocalización homologado.

"Polo tanto é mellor que cando compremos a luz V16 sexa xa a que vai ter conexión coa DXT porque para esa data será a obrigatoria", matiza o axente Teixeira.

Malia que a maioría da xente regresa ao coche, a recomendación xeral é agardar a asistencia fóra do vehículo.

"Fóra pero non no medio da calzada, hai que ir detrás dun valo ou da varanda de protección ou lugares afastados do perigo".

Se non é posible afastarse da estrada, o condutor pode agardar no coche, pero sempre co cinto posto, xa que un vehículo parado está moi exposto á colisión.