A Garda Civil desmantela un vertedoiro ilegal nunha zona forestal da Coruña
A Garda Civil desmantela un vertedoiro ilegal nunha zona forestal da Coruña
Os restos procedían da limpeza dun edificio deshabitado situado na cidade da Coruña
![](https://img-g24-crtvg.flumotion.com/prog24/2023/20230817/20230817VertedoiroZapateira.png)
A patrulla do Servizo de Protección á Natureza da Garda Civil da Coruña, en colaboración cun axente forestal do Distrito II, desmantelou unha entulleira incontrolada nunha zona forestal da Zapateira, entre os municipios da Coruña e Arteixo.
Segundo informa o corpo, os axentes realizaban labores de prevención de incendios forestais na zona cando observaron a presenza dunha entulleira incontrolada formada por utensilios domésticos, como roupa ou colchóns.
A entulleira, apuntan, "xeraba un grande impacto ambiental na zona, así como un risco en caso de producirse un incendio forestal", tendo en conta que o índice de risco diario de incendio está establecido como moi alto nesa zona.
Os axentes lograron descubrir que os restos procedían da limpeza dun edificio deshabitado situado na cidade da Coruña, sen que os seus responsables entregasen os residuos a unha empresa ou persoa autorizada para o transporte e xestión dos mesmos.
A Garda Civil procedeu á confección das pertinentes denuncias aos propietarios do edificio e ao resto de participantes no traslado dos restos. Así mesmo, instáronos á retirada e correcta xestión dos residuos.