A Garda Civil detivo un veciño na Pobra do Caramiñal tras interceptarlle unha gran cantidade de heroína

A Garda Civil do posto principal de Boiro levou a cabo unha operación que culminou na desarticulación dun punto de venda de substancias estupefacientes en pleno centro urbano da Pobra do Caramiñal.

A investigación iniciouse tras detectaren unha constante presenza de toxicómanos na zona. Durante o desenvolvemento da operación, os axentes interceptaron un individuo xusto despois de que este adquirise unha importante cantidade de droga para a súa distribución. No seu poder, atoparon un total de 1.118 doses de heroína.

Levaron a cabo rexistros en dous domicilios asociados ao detido, onde se incautaron de 158 doses máis da mesma substancia e de 245 euros en efectivo e unha báscula de precisión. O vehículo utilizado para cometer o delito e mais un teléfono intelixente foron igualmente confiscados e agora están á disposición xudicial.

Coa detención do responsable e a intervención das substancias, logrouse desmantelar por completo o punto de venda de drogas na Pobra do Caramiñal. O detido compareceu no Xulgado de Primeira Instancia e Instrución en Funcións de Garda de Ribeira, onde a Autoridade Xudicial decretou a súa liberdade provisional, coa obrigación de presentarse os días 1 e 15 de cada mes.