A pesca pide ao Supremo que anule o real decreto que regula a eólica mariña

A Plataforma Manifesto de Burela presentou unha demanda ante o Tribunal Supremo para que anule e revogue o Real Decreto sobre os Plans de Ordenación do Espazo Marítimo (POEM) que se aprobou a finais de febreiro e que reserva espazos para a eólica mariña; tamén criticou a Administración por elaboralos sen informes científicos e socioeconómicos do impacto desa decisión.

A entidade, que agrupa unha trintena de colectivos de Galicia, Asturias, Cantabria e Euskadi, está apoiada nesta acción pola Federación Nacional de Confrarías de Pescadores e a Federación Rexional de Confrarías de Pescadores de Canarias, presentes no acto de hoxe.

A demanda, que contén cen folios, foi interposta na semana das eleccións xerais, o xoves 20 de xullo, aínda que os seus promotores evitaron darlle publicidade nese momento para que non interferise no proceso electoral.

Segundo explicou o portavoz da plataforma, Torcuato Teixeira, este xoves nunha conferencia de prensa na lonxa da Coruña, a admisión da demanda xa foi notificada e trasladada á Avogacía do Estado para que conteste a administración.

Solicitan que se anule e revogue o Real Decreto dos POEM no referente ás zonas reservadas para a eólica mariña, aínda que non requiren medidas cautelares porque "atrasaría a resolución" do Supremo. Estiman que é "moi difícil" que ese fallo se produza en "menos de dous anos" e esperan que "non se lle ocorra a ningún Goberno outorgar concesións cando o Tribunal Supremo ten que pronunciarse".

Teixeira advertiu de que o sector "é o máis afectado polo cambio climático" e asegurou que "non se opón ás renovables", pero tampouco pode ser -dixo- "carne de sacrificio" para que os polígonos da eólica mariña se instalen nas costas españolas "sen o menor rigor e criterio científico" e "poidan acabar coa pesca e ecosistema marítimo".

A demanda está amparada, entre outros, nun informe do Observatorio do litoral da Universidade da Coruña (UDC) que detectou, segundo o portavoz da plataforma, once irregularidades de carácter xurídico tanto a nivel nacional como internacional e o quebrantamento do principio de precaución.

Reprochan, ademais, que o expediente administrativo de ordenación do espazo mariño, con case 2.000 folios, non inclúa "un só informe que indique se a instalación destes polígonos poden afectar os ecosistemas marítimos nin datos de impacto socioeconómico" sobre as consecuencias que tería a implantación destas industrias.

A demanda encabezárona coa "vulneración do artigo 130.1 da Constitución" respecto a que "os poderes públicos deben promover o desenvolvemento de todos os sectores económicos", con "especial consideración" cara á "artesanía, agricultura, gandería e pesca" e precisaron que "o enerxético non está" entre estes últimos.

O informe da UDC considera, segundo os demandantes, que "a ordenación do espazo mariño ten un rumbo e unha inclinación evidente: favorecer por encima de calquera outra consideración a implantación da eólica mariña nas costas españolas".

Lembran que o directiva marco de ordenación do espazo mariño da Unión Europea "non obrigaba a España a reservar espazos para a eólica mariña", senón que se trataba de "ordenar os espazos mariños e, se houbese espazo" para esa industria, "reservalos". Ademais, din,  "un regulamento, un Real Decreto, non puiden limitar a actividade pesqueira sen haber previamente unha autorización legal".

Teixeira afirmou que se está sacrificando "á pesca e o ecosistema marítimo para que outras industrias fagan o seu agosto e especulen".

O presidente da Federación Nacional de Confrarías de Pescadores, Basilio Otero, afirmou que "tal e como están deseñados os POEM", o "futuro do sector esgótase".

David Pavón, presidente da Federación Rexional de Confrarías de Pescadores de Canarias, indicou que eses plans supoñen un "gran problema" para as Canarias, "que non é outro que ter vento".

A secretaria da Federación de Confrarías de Pescadores de Asturias, María José Rico, lamentou ter que recorrer "aos tribunais tras esgotar as vías políticas".

O presidente da Federación Galega de Confrarías, José Antonio Pérez, asegurou que a frota está a faenar en zonas onde foron colocados os POEM "facendo caso omiso" ás advertencias dos pescadores e prognosticou que será "case inviable manter as empresas" se saen adiante eses plans.