A piques de morrer nun restaurante de Monforte un home que se atragoou cun anaco de carne

Un gran susto levaron nun restaurante de Monforte cando un home se atragoou cun anaco de carne. 

"Xusto nunha mesa en fronte de min escoito dicir: coidado que se atragoa, coidado!. Eu rapidamente peguei un salto, fíxenlle os primeiros auxilios, pero xa me dei conta de que era grave o tema".

"Estaban empezando xusto a comer, eu creo que foi no primeiro bocado da carne", conta Julio Méndez Rodríguez, dono do restaurante La Polar.

O dono actuou rapidamente nun primeiro momento, pero foi decisiva a intervención dunha médica de urxencias do hospital de Monforte que estaba nese intre no local. O home estivo inconsciente varios minutos, pero puido salvarlle a vida. 

"Por sorte, había unha doutora comendo aí fóra. Grazas a ela... se está vivo, eu creo que lle debe a ela que estea vivo", lembra o dono do local.

Paralizaron a actividade no restaurante para atender o home atragoado, primeiro tentaron facerlle a manobra de desosbtrución das vías respiratorias, pero non deu resultado. E mentres chegaba a ambulancia, a médica non parou de practicarlle a reanimación cardiopulmonar, ata que despois duns desesperantes minutos puido mantelo con vida.

"Non é agradable contar esta historia. A pequena información que teño é que estivo uns minutos fóra, vaia", conta Julio Méndez.

Por sorte, o home reaccionou. Ata o lugar tiveron que trasladarse dúas ambulancias medicalizadas para atendelo e foi trasladado á Unidade de Coidados Intensivos do hospital de Lugo, onde se recupera.

O dono deste coñecido restaurante di que o mellor agasallo de verán que pode ter é que o home, un cliente habitual, se recupere sen secuelas.